अस्ट्रेलियाको उत्तरी सहर डार्विनमा बस्ने पेशाले सेल्स असिस्टेन्ट रहेका फिल न्युटनलाई आफ्ना आँखाले देखेको कुराप्रति विश्वासै लागेन जब उनले सडकमा एक कुकुरले डबल डेकर बस चलाइरहेको देखे । यस्तो दृश्य देख्दा उनीमात्र होइन त्यहाँका अरु मानिस पनि अचम्ममा परे ।
३० वर्षका प्रत्यक्षदर्शी फिलका अनुसार उक्त कुकुर बसको ड्राइभिङ सिटमा बसिरहेको थियो र उसका पञ्जा स्टेरिङमा थिए ।
बस आफ्नै गतिमा गुडिरहेको थियो र अगाडि गएर ठोक्किने खतरा भएपनि उक्त कुकुरलाई कुनै परवाह थिएन । त्यो बेला बसलाई नरोकेमा दुर्घटना हुने सम्भावना थियो त्यसैले फिलले दौडिँदै गएर बसको खुलै रहेको झ्यालबाट पसी तत्काल ह्याण्डब्रेक लगाए र बस रोकियो । बस झ्वाट्ट रोकिएपछि कुकुर अर्को झ्यालबाट फुत्त भाग्यो ।
वास्तवमा दुइवर्षको जर्मन जातको कुकुर वुड्ले ले आफ्नो मालिकको नक्कल गर्दै बसको ह्याण्डब्रेक हटाएको थियो जसका कारण बस पार्किङबाट गुड्दै सडकसम्म आएको थियो ।
कुकुरका मालिक ६२ वर्षका रिचार्डले आफ्नो कुकुर प्रायः बसमा आफुसँगैको सिटमा बस्ने गरेको र आफुले गाडि चलाउँदा ब्रेक लगाएको देख्ने भएकाले त्यसकै नक्कल गर्दै ब्रेक हटाइदिएको हुनसक्ने बताए ।
No comments:
Post a Comment